عطوها للمحلي بالك خير!

الكتاب المدرسي أزمة سببت تعب وارهاق لكادر التدريس وحتى اولياء الامور صار فيهم ماصار ولكن لازم توفيره وعدم ترك الامور تمشي بتعب والحظ الي يلقى كتاب ..

في خبر جديد تقدمت الشركة العامة للورق والطباعة بمقترح لطباعة الكتاب المدرسي وفق المعايير المعتمدة منذ العام الدراسي 2020–2021.. ولم يتم النظر في هذا المقترح حسب قول رئيس مجلس إدارة الشركة ..

وفي تصريح أخر لمدير مركز المناهج التعليمية بوزارة التربية والتعليم تداولته بعض المنصات بأن الوزارة لم تتعاقد على توريد الكتاب المدرسي للعام الدراسي الحالي وأن الكمية الموجودة في المخازن الرئيسة والفرعية تقدر بأقل من 10‎%‎ من الاحتياجات المطلوبة للكتب المدرسية ..

اه اهنى مربط الفرس .. باهي العام هذا يتم على خير ..

لكن فكروا بكري في العام الجاي مش كل عام زي الي قبله .. مدام التكاليف أقل والمواصفات كويسة .. أعلاش التعطيل ؟ والا كان عندكم راي وبزنس ثاني .. 

العذر لكن الشي زاد علينا معاش الواحد يقدر يسكت لانه مصير أجيال امانة عندنا .. 

وخلونا من هذا العام المهم قاعد يمشي على خير .. وفكروا في الطباعة المحلية.