بلدية طرابلس المركز نبهت السادة المواطنين والقاطنين بأنه سيتم إغلاق الطرق المؤدية الي ميدان الشهداء ابتداءً من يوم يوم 1/12/2024 وذلك للقيام بأعمال تحسين و تطوير ميدان الشهداء والمنطقة المحيطة به وأضافت نرجو من جميع المواطنين التعاون معنا واستخدام الطرق البديلة..
تابعنا درود وتعليقات الجمهور على المنشور :
أخت من سكان المنطقة كتبت :
الله لا يضيق علينا واسعة ناقصه البلاد زحمه هي كيف بالله اللي بيمشي لمصرف ولا المدارس اللي غادي واللي بيمشي لشغله والله مافهمت منين الخبراء جايبينهم اللي يطلعو في القرارات..فات صيف طويل عريض تفكرتو توا ..
أحدهم علق بقوله:
الموضوع مش فالصيانه الموضوع كيف بتفكر تعالج الزحمه والاشتباك المروري اللي بيصير نتيجة تصكير الطريق..
السيد أحمد قال : كيف الناس بتوصل والطريق من جميع الأنحاء سكرتوها شن القرارات الرائعه هادي سيبو الصيف كله الي مافيشي قرايه ولا فيه صقع ولا مطر جو في الوقت الغلط اعطو لناس عطله هو هكي ولا هكي معاشات الشهر تعطوها في شهرين..
عمي الحاج طلع عن الموضوع وقال : بالله شوفنا حل للمناظر المزرية في كل ازقة طرابلس وضواحيها من الأماكن المحتجزة من كل بيت أو محل حاط قدامه شيش ميه ويلي حاط حديد سلسلة ويلي حاط عجلات قومة منظر بصراحة مشين للمارة نظفونا المكان الله يربحكم..
من جهتنا عندنا عدة نقاط هو التطوير قنين ومعندناش ما نقوله فيه ، بس وين الطرق البديلة اللي بيستخدمها الناس كان من المفترض في خطة توضح تلك الطرق ؟
وبعدين كل مشروع ليه مدة زمنية ياريت وضحتوها في المنشور باش الناس تطمن ؟
والحق التطوير كان لازم يكون لان كل الميادين في الدول ميكونش فيها طرق للسيارات تكون مفتوحة لناس وأكيد تقعد المعالم التاريخية فيها ..
تعقيباً على الخدمة لازم تكون الصيف ، بالك واقفة على الميزانية تصير والا ..
المحررة
