شن صار

ازمات متكررة .. وحلول مؤقتة ..

من شهر فات كلمنا عميد البلدية أوباري : احمد ماتكو :وأشار للازمة الي تعيشها البلدية ..

وفي اتصال ثاني قال فيه : نعم مازالت جالون البنزين خمسون دينار والغاز ستون دينار

وزاد قال : ان الوقود وصول الوقود للبلدية لشهر كامل هو الي زاد من عودة أزمة الوقود بعد   ما شهدت انفرجاً خلال المدة القلية الماضية ..

واضاف : حل الازمة هو زيادة مخصصات الوقود وانتظام وصوله ..

من كلام العميد فهمت ان الازمة مش في الوقود بس ، الازمة حتى في غاز الطهي ..

البعض قال : تراجع  نشاط الوقود بنسبة 45%  خلال الفترة الحالية يجب معرفة اسباب هذا التراجع .

راي أخر : ليش ما يكونش مستودع اخر في اوباري ، ليش سبها بس .

باهي شن يضمن ان زادت مخصصات الوقود مايصيرش فيها تلاعب ؟

لان آراء البعض في البلدية يقولو ان العملية فيها تهريب وبيع خارج محطات بيع الوقود ..

الموضوع كبير ويحتاج وقفة جادة .. وياسر الناس ما تعاني .

ونزيد انقول .. غاز الطهي ناقص حتى في السوق السوداء ..

وين يمشي المواطن حتى بفلوسه مالقهاش .. الصراحة هكي هلبه ..

وفي الاخير  .. الحق تعبنا واحنا نعرضو في نفس الازمات من غير حلول شافية ..

صح فيه تعب لكن احنا صوت المواطن انزيدوه انكرروا ونعاودوه لين يجي الفرج   من اصحاب الحل والربط ..

وبعد هالرصد والتساؤلات زعمه يمشي الموضوع عادي .. وكأنه ما صار شي !!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى