زي كل جمعة ولعت الموطو قريب الساعة عشرة وقلت يالل . من زنقة الشيخة راضية ، يمين الجمهورية ، بعدين يسار شارع الزاوية الى ميزران قهوة من محمد ثم انطلقت من جديد . زي ماتفاهمنا قبل ، محلاها طرابلس يوم الجمعة ، وبالذات على الموطو ، طريق فاضية تذكرت مسلسل الرسوم (تاكيا تدروكي ) وللي لحق عليه و يعرفه يتذكر اغنية المقدمة بالذات (ياصديقي انت رائد الفريق ) المهم صارلي زي (تاكيا ) انتابني الشعور بانني سيد الطريق . لم ادخل لقلب المدينة من الشارع متع مصرف الادخار ، بل دخلت من شارع قهوة عمي فتحي ، على يميني هنا كانت (شهريار) قهوة عمي بشير الله يرحمه ، ايه يادنيا احلى بقلاوة فيك ياليبيا ، واحلى هامبورقا في التاريخ . كملت في الطويل خطمت قدام الخطوط الجوية الليبية واه ياسينما الحرية ( هرقلي) و (ماجيستي ) و (سبعة ضد الجميع ) . اربع شوارع هايتي وقفت بروحي في الطريق ، طفيت الموطو ورحلت بعيد . على يمينى مقهى اشبيلية ، جنبه سينما (الزهراء ) افلام هندية ، بوليوود ليبيا سينما الزهراء ، عمي الفيتوري الله يرحمه ، ومحمد قديح الله يشفيه ويمن عليه بالصحة والعافية ، ومن الاخير نخشوا من غير (البوليط ) . على اليسار ، دار عرض عمر الخيام هنا شاهدت فيلم الافعى الهندي ، واول عرض لفيلم الرسالة ، طابور طويل ، منظم صغار بلاد اللي واقفين فيه ، ساعتها نتذكر فيها وين مات حمزة بكت الصالة كلها ، وكرهنا وحشي ، ووين خش خالد بن الوليد للاسلام الصالة ضجت بالتصفيق . سينما عمر الخيام دار عرض صيفي ، السقف متحرك ، العرض الاخير تشوف الفيلم والتاج على راسك ، سماها ليبيا الصافية .. قمر ونجوم . ولعت الموطو ، و توكلت ع الله في الجديد . باتجاه المرسى هايتي ، ميدان الجزائر ، اربع شوارع البلدية لفة على ميدان الغزالة (من سرق الغزالة ) من مزق التاريخ … صعدت يمين الى الظهرة ، ثم يسار كوبري الودان نزول الى طريق الشط ، وصلت البنكينا . لا هنايا العكس لقيت الدنيا زحمة ، ليبيا كلها قدامي تبي تشري حوت، وصحة ليك عمي الانترنت . لدرجة بالدعاك حصلت مكان للموطو ودرست . خشيت البنكينا في راسي المحرات مشيت لعمي الراجل طول قداش المحراث ياعمي قالي ب 30 خديت كيلو ونص . كملت الدورة نسال ع الكوالي لقيته خشين ب 20 متوسط 18/15 دورة عمي الراجل متع الكوالي قال كله متوسط على خشين بعشرة جنيه درنا زحمة قدامه و خذيت منه بثلاثين جنيه . زحمة السوق يوم الجمعة طلعت منه (السيزر) يغرد زي العادة السوم مليح الرزام ب 15 توكلت ع الله وانا طالع خطمت على مكانك اتذكرتك عمي علي مبارك السوق في غيابك فوضى وضيق .سيستم مافيش . كون بخير ياصديقي سرحت بعيد بعيد اكثر تسعينات تذكرت ايام السردينة التيلار بعشرة والقرنيط اغرف بيدك كله كله بخمس جنيه
