لقيت منشور في إحدى الصفحات صورة لسيارة واقفة فوق الرصيف، والشجرة في مكانها، والمواطن هو اللي مطلوب منه يلقى طريق ثانية يمشي فيها !
المشكلة مش في سيارة واحدة وقفت في مكان غلط، المشكلة في عقلية تقول: «المهم نوقف.. والباقي يدبر راسه». الرصيف مخصص للمشاة، للأم اللي ماشية مع صغارها ، للكبير في السن، وللي يبي يمشي بأمان من غير ما يضطر يمشي بجنب الرصيف ويغامر بحياته.
والأغرب إن بعض الناس يتعاملوا مع الرصيف وكأنه مساحة إضافية للسيارة: مرة موقف، ومرة محل، ومرة بضاعة، .. والمواطن في النهاية يمشي في الشارع!
احترام الرصيف مش مجرد مخالفة مرورية نتفادوها لو فيه شرطي قريب، هو احترام للناس وللمكان اللي نعيشوا فيه. لأن المدينة المرتبة مش بس شوارعها مشجرة ومبانيها مدهونة.. المدينة المرتبة تبدأ من سلوك المواطن، ومن احترامه لحق غيره في الطريق.
