المدة الماضية مريت من الطريق السريع باتجاه الغرب ، يعني من جزيرة الدرن الى جنزور ، الصراحة السريع تغيير هلبه خاصة في جوانب الطريق ، كله معشب منظر جميل جداً ، المية ترش في العشب زادها جمال ، طبعاً الجو سخون وصيف ومنظر زي هذا يعتبر إنجاز لاننا تعودنا على طرق يابسة. «شيمنت» وخرسانات صلبه تزيد في حدة فصل الصيف ، إي هكي الخدمة المزبوطة ونتمنوا كل الطرق والشوارع نظيفة وخضراء ورطبة مش «شاعته» ، أما شوارع وسط البلاد نذكر من سنوات فيه سيارات صغيرة «اتبخبخ» في المية في الصيف ، ليش ما ترجعش ؟ راهو الصيف طويل ومازال الجو يسخن ، رشوا الميه ولطفوا الجو لو سمحتم ، طبعاً الكلام للجهات المسؤولة .
