كلنا نتفقوا أن المساحات الخضراء مهمة خاصة في فصل الصيف ، ومعظمنا تكلمنا وقاعدين نتكلموا ونطالبوا بتوفير أكثر من «جردينة» لقضاء أوقات العشية في الصيف والبعض يهرب من الحوش لما يهرب الضي ، هي الحكاية هروب في هروب ، باهي جزيرة سوق الثلاثاء تعتبر أكبر مساحة خضراء وتتوفر فيها ألعاب للصغار ويجوها من وين وين ، لكن بعد ما يروحوا العويلة يخلوا «القمامة» في مكانهم من غير حشم ، المكان العام زي المكان الخاص راهو عيب ، شركة الخدمات العامة غلبت فيكم وتعبت من لا مبالاة ، نظافة المكان اللي كنت فيه يعكس ثقافتك واحترامك لبلادك وناسك ، الصورة من عين المكان من أخت فاضلة تأسفت من المنظر صوراته وبعثتهولي ، هذا هو حس المسؤولية والوطنية تمثل في أبسط صورة.
