عقدت لجنة الأزمة ببلدية مرسى دفنة، أول اجتماع لها وناقش الاجتماع عددا من المواضيع المتعلقة باحتياجات البلدية والمختنقات الأساسية في مختلف القطاعات، بهدف تحسين الخدمات وتخفيف الأعباء على المواطنين. اجتماع لجنة الأزمة خطوة مهمة، لكن المواطن يبي يعرف أكثر من مجرد عقد الاجتماعات ومناقشة الاحتياجات.شن هي المختنقات اللي تعاني منها مرسى دفنة؟ وشن الأولويات اللي حطتها اللجنة في مقدمة اهتماماتها؟ وهل فيه خطة واضحة لمعالجة المشاكل، بجدول زمني محدد، ولا الموضوع ما زال في مرحلة الحصر والمناقشة؟ المواطن من حقه يعرف شن اللي ناقشته اللجنة، وشن المشاكل اللي بتبدأ بمعالجتها، وكيف بتكون آلية متابعة التنفيذ. لأن نجاح لجنة الأزمة مش بعدد اجتماعاتها، لكن بالحلول اللي بتقدمها، والنتائج اللي يلمسها المواطن في حياته اليومية. المطلوب توضيح الأولويات للرأي العام، لأن معرفة المشكلة هي أول خطوة للحل، والشفافية هي اللي تخلي المواطن يتابع ويقيم النتائج.
