منبر صفحة مراقبة شؤون البيئة تاجوراء يناشد مراقبة التعليم توفير حاويات قمامة ملوّنة في المدارس، تكون مقسمة حسب نوع النفايات: البلاستيك، والمواد العضوية، والمعادن، والورق. الخطوة هذي مش مجرد توفير حاويات، لكنها بداية لتعليم تلاميذنا كيف يحافظوا على بيئتهم، ويفرزوا القمامة من مصدرها بدل ما تنرمي كلها في مكان واحد. وقسم المحافظة على الطبيعة أكد إنه بيشتغل على توعية الطلبة بأهمية فرز النفايات، وبيسعى لتوفير الحاويات الملونة داخل المدارس.
والتعقيب حول الخبر :الوعي البيئي يبدأ من المدرسة
مش كفاية نحكوا على النظافة والمحافظة على البيئة، لازم نعملوا صغارنا كيف يطبقوها في حياتهم اليومية. المدرسة هي المكان المناسب لغرس السلوك البيئي الصحيح، وفرز القمامة من المصدر خطوة تساعد في تسهيل إعادة التدوير، والاستفادة من المواد المستعملة، وتقليل النفايات اللي تضر بالبيئة. لكن توفير الحاويات بروحه مش كفاية؛ المطلوب توعية مستمرة، ومتابعة لطريقة استخدامها، وضمان إن النفايات المفروزة ما تختلطش ببعضها وقت الجمع والنقل.
البيئة النظيفة تبدأ بفكرة، وتكبر بسلوك، وتستمر لما نعملوا أولادنا إن المحافظة عليها مسؤولية كل واحد فينا.
