هذا مثل شعبي قديم، لكن مرات تحس إنه مكتوب مخصوص على بعض المشاريع الجديدة، خاصة المقاهي والمطاعم. أول ما يفتح المشروع، تلقى كل شي على أحسن ما يكون.. خدمة ممتازة، أكل مرتب، نظافة، اهتمام بالتفاصيل، والزبون يحس إنه مهم. وتمشي الشهور، ويمكن السنة ،ويبدأ العدّ التنازلي! الزبون اللي تعوّد على مستوى معين من الخدمة، يبدأ يلاحظ التغيير.. في النظافة، و في سرعة الخدمة، وجودة الأكل، وحتى في أبسط التفاصيل اللي كانت في البداية هي سبب إعجابه بالمكان. والغريب إن عدد قليل من المشاريع يحافظ على نفس المستوى من يوم افتتاحه ، بينما مشاريع ثانية تخسر زبائنها تدريجيًا بسبب تراجع الخدمة. شن السبب؟ هل هو ضغط العمل؟ زيادة عدد الزبائن ؟ تغيير العاملين؟ ولا بعد ما يضمن المشروع زبونه، يبدا الاهتمام يقل؟ رضا الزبون والمحافظة على جودة الخدمة مش مرحلة افتتاح وبس، بل أساس استمرار المشروع ونجاحه. وهنا يجي دور أهل الاختصاص في الاقتصاد وإدارة الأعمال لتحليل الظاهرة ومعرفة أسبابها، حتى يستفيد منها أصحاب المشاريع والشباب اللي خاشين عالم البزنس، ويعرفوا إن التحدي الحقيقي تخلي الزبون يرجعلك بنفس الرضا كل مرة. وزي ما يقول المثل: كل جديد وليه طهقة.. لكن المشروع الناجح طهقته ماتمش.
