صيانة حديقة الحيوانات وافتتاحها قريباً كان لها صدى كبير خاصة على الصغار ، شركة الخدمات العامة قامت بتنظيف الحديقة وبعض أعمال الصيانة ،طبعاً الحديقة سنوات طويلة كانت مصكرة وتعتبر هي الحديقة الوحيدة في طرابلس ، مهما كانت أسباب اغلاقها امام الجمهور خطى هي ملك عام للشعب ومتنفس للمنطقة ، ماعلينا المهم تقعد مفتوحة وتكون خالية من المظاهر المسلحة ..
رصدنا بعض الاراء حول هذا الافتتاح :
مواطنة كتبت : حتى ولو بتفتحوها في العيد لازم تستمر الصيانة راهي تبي خدمة وديرولها تحديث للحيوانات وأهم حاجة اليافطات التعريفية للحيوانات والإنارة وأهم شي السلامة مش تفتحوها ومش مشيكين على الأبواب والنوافذ والحديد متاع الحماية الفاصل على الحيوانات المفترسة..
اميرة نفسي : تحية شكر وامتنان وعرفان لكل موظف وعامل في شركة الخدمات العامة طرابلس على تواجدهم في كل مكان وبأي زمان مع حرارة الشمس وبرودة الطقس ربي يبارك فيهم وفي صحتهم ويبارك في رزقهم ويحفظهم ربي من كل مكروه :
يسرى تسألت : مدام فيها حيوانات وحلوة وجميلة هكي علاش ماكانتش مفتوحة للزوار من زمان .!؟
حاتم : هي المتنفس الوحيد في ليبيا في مجال ترفيهه في ليبيا الناس اعيو من الكرنيش ونافور حتى مصيف السندباد ياريت الصيف يرجع لي المصطافين وأهل طرابلس وكل زوار طرابلس ايصيفو فيه:
ايات ابو بكر : تفكرت أيام مدرسه التقدم و زهور الوفاء:
أم كريم :جانا الفرج .. ياريت تتهدم كل المقرات العسكرية ويديرو معسكرات بعيد علينا :
خديجة كتبت :لينا زمان ماسمعنا صغار مشو زياره لحديقه الحيوانات….ياريت مستقبلا إستقبال زيارات مدرسيه لطلبه ليها أهمية كبيره لدراسه العلميه والعمليه لطلبه بذات الفصول في المرحله الإبتدائيه :
آراء الناس كلها تبي السلام والتنمية وهذه وحدة من الخطوات الصحيحة والباقي مازال ؟
