خطرها ..
من الحاجات اللي نلاحظوا فيها في أخبار تنشرها بعض الوزارات والهيئات الحكومية، إن الصورة المرفقة مرات ما عندهاش علاقة مباشرة بالخبر، أو ما تعكسش الموضوع اللي يتكلم عليه الخبر. يعني تقرا خبر على مشروع جديد، أو جولة ميدانية، أو أعمال صيانة، وتلقى الصورة ما توضحش شن صار بالضبط! الصورة مش مجرد تكملة للخبر، الصورة في حد ذاتها رسالة، وتقدر توضح للقارئ تفاصيل مرات الكلام بروحه ما يقدرش يوصلها. وهني يجي السؤال: علاش ما يكونش في كل وزارة أو هيئة مصورين صحفيين متخصصين، يرافقوا فرق العمل ويوثقوا الأحداث والأنشطة بالصورة المناسبة؟ لأن الصورة الصح مش بس تعطي للخبر قيمة أكبر، بل تعزز مصداقيته وتخلي المواطن يشوف بعينه شن اللي صار على أرض الواقع. في الإعلام، مش كل صورة تنفع لكل خبر، ومش كل صورة تنقل الحقيقة اللي نبو نوصلوها للقارئ. العدسة الصح هي اللي تخلي الصورة تحكي الحكاية بكل وضوح.
